4 de Chunio: Diya internazional d’a catrinalla.

A catrinalla, bitimas inozens de l’agresión

O 19 d’agosto de 1982, en o periodo estraordinario de sesions d’emerchenzia sobre l’afer de Palestina, l’Asambleya Cheneral d’a Organizazión d’as Nazions Unitas, consternada per o gran numero de ninos y ninas palestins y libaneses inozens bitimas d’os actos d’agresión d’Israel, dezidió de conmemorar o 4 de chunio de cada añada o Diya Internazional Infancia Bitimas Inozens de l’agresión.

A conmemorazión d’o 4 de chunio se fa ta promober a protezión d’os dreitos d’a nineza, en condizions de paz y seguridat sin os efeutos nozibles que produzen os conflitos armatos. Ye urchén incrementar a protezión infantil per tal de pribar que partezipen en ista mena de luitas.

Iste 4 de chunio nos da una razón más ta no silenziar as causas d’a guerra perén que padexe a CATRINALLA EN O MUNDO y que afeuta a millons de menors. Actualmén, bels 200.000 menors de tot o mundo son aforzatos á partezipar en guerras, que afeutan de tot á o suyo desembolique fisico, psicolochico y sozial.

A infancia y a guerra: bels datos que esgarrifan, d’alcuerdo con UNICEF…

.Cuasi a metat d’os 3.6 millons de personas que son muertas en conflitos dende 1990 yeran menors d’edat.

.Uns 20 millons de ninos y ninas han abiu de fuyir de casa suya debiu á las guerras.

.En Sierra Leona bi ha las tasas absolutas de mortalidat de menors de zinco años más grans d’o mundo, dimpués de diez añadas de guerra zebil: 284 catrinallas de cada 1000 no plegar á fer zinco años.

.Zientos de mils catrinallas son estaus aforzaus á beyer actos de biolenzia u á partezipar-ie. Muitos han de combertir-sen en esclaus sexuals, coziners, sirbiens, mensachers u espías.

.En Ruanda 2000 mullers, muitas d’ellas superbibiens de biolazions, fuen sozmesas á la preba d’o VIH mientres as zinco añadas siguiens á o chenozidio de 1994. D’ellas, o 80% yeran seropositibas. Muitas no eban manteniu relazions sexuals antis d’a guerra.

. menors y adolescenz son reclutaus per estar un potenzial umano disponible, feble y capable de fer bellas fainas en os frens de combate sin parar cuenta en os risques.

.O emplego d’os ninos y ninas en a guerra ye una ecuazión que encaxa perfectamén en as mentes macabras. Per un regular, menors y adolescenz obedexen sin tartir, pueden estar empentaus á cometer actos atrozes y son más baratos que no pas os adultos.

Asinasmesmo, a biolenzia cuentra menors, tamién s’exerze dintro de casa, per meyo d’o castigo fisico, a manca d’atenzión u lo maltrato psicolochico. Tampó no emos de xublidar os maltratos fisicos y psicolochicos que s’exerzen orizontalmén, ye dizir, a biolenzia d’os ninos y ninas y adoleszens enta os suyos iguals.

“O condizionamiento sozial que ideyaliza la guerra y amuestra á os menors á reprimir a sensibilidat, á fer-se duros y duras, á no tener miedo, á no plorar, á balurar a bitoria per denzima de tot, menan ta o desembolique d’un “masclismo mental” entre os puliticos que deziden sin parar cuenta en escruplos morals u emozionals. A suya “masculinidat” amenista o “corache” de prener dezisions sin preocupar-sen per o sofrimiento que puedan prebocar en atras personas. A “frialdat” á l’hora de prener dezisions, fundamén unida á las balors d’a mistica d’a masculinidat, ye alabez la más clara contrimuestra d’a razionalidat masculina”.

(Miedzian,1996)

http://cedoc.inmujeres.gob.mx/documentos_download/100556.pdf

http://www.educared.net/primerasnoticias/hemero/2009/junio/soci/agresion/print.pdf.