L’aragonés ye bien vivo!

Con rasmia, sin reblar, con delera, ababoleras royas se devantaban creixendo argüellosas ent’o cielo, desafiando a un diya griso y fredo d’agüerro. A foscor d’o diya no consiguió contachiar-se en l’animo de totz y todas as que hemos quiesto fer una mica mas gran una luenga tan chiqueta, de vez que polida y muit, muit viva como ye l’aragonés.

Una chornada que prencipiaba en Radio Topo, en o 101.8 d’a FM zaragozana con o soniu d’o revel, a ixo d’as 10.00 horadas, con una chiqueta introducción a l’aragonés, con curset practico, asinas como explicar porqué se fa ista emisión especial, fablando d’a Carta Europea d’as Luengas Minoritarias y o suyo 19º cabo d’anyo, enchaquia que nos levó a planteyar ista chornada.

Carlos, Tamara y Chusé nos fabloron d’o libro de cuentos en aragonés “Prou, prou luen” y o suyo proceso de creyación. Una iniciativa mas ta meter a l’aragonés en o puesto de normalización y importancia que mereixe.

“A Liendrera” (La Enredadera), o conoixiu programa de Radio Topo
tamién se sumó a la iniciativa fendo lo suyo programa de raso en
aragonés y con mosica en directo a cargo de “Furo” de Dechusban.

Prencipiamos a fer fambre en a “carrera Mayor” a on nos i chuntamos ta
decir-tos cómo parar bellas recetas de cocina aragonesas, con conexión
en directo con a cocina, amás de recentar-tos as cronicas de bells
conciertos d’o diya anterior y charrar d’a situación d’as zapatistas
en Chiapas d’a man de Caracol Zaragoza.

En a hora d’a chenta, qué millor que descubrir u remerar a collas d’os
decenios 80 y 90 en luengas minorizadas, mientres “Karlos Arguiñano”
se colaba ta cantar-nos a suya canta y tastabanos unas buenas migas
vechetarianas.

A ixo d’as 15.oo horadas, dende Radio MAI, i vinió lo programa “A
Lucana”, antigo “As zien claus” y actual “Mosica y parolas”.

T’a sobremesa, mientres a hora d’o café, rufierta. Charramos en “Fendo
Orella” con Rubén Ramos y Fernando Sánchez sobre a historia de
l’aragonés en as radios aragonesas, asinas como d’a situación actual
d’iste idioma.

As mesachas d’o colectivo feminista y independentista “A clau roya”
nos charroron sobre mullers y feminismo. Charradas, cuentos y
asinas-asinas. Mullers libres en una Aragón libre!

O veterano programa de Radio Topo “Hijos del agobio”, aquí clamau t’a
enchaquia “Fillos de l’angunia” querioron acompanyar-nos y refirmar a
nuestra luenga fendo lo programa en aragonés.

A las 19.00 horadas, os repuis d’a radio. Una mica de tot. Medicina,
albeitaria, sciencia, mosica… tot o que nos vagaba de charrar, de raso
en aragonés, porque en aragonés se puede charrar de tot.

O Colectivo Pedalea nos querió acompanyar en iste diya ta fer o suyo
veterano programa “Rueda Libre” en aragonés. Bicis en luita, historia,
Occitania, relatos, cursas… Fe servir a tuya bici, tamién en aragonés!

Y ta rematar o diya, dica las 22.00 horadas esfendiemos a nuestra
tierra, Aragón, de l’anglucia d’os de siempre, d’os capitalistas.
Luitas territorials, sin reblar, esfendendo o meyo ambient, a nuestra
tierra, a nuestra vida. Caciques au d’astí!

Dende Fendo Orella, queremos dar as gracias a todas as personas que
querioron acompanyar-nos y aduyar-nos en iste diya tan especial tanto
ta nusatros/as como ta l’aragonés, a nuestra luenga, asinas como
agradeixer a todas as personas y meyos de comunicación que han
espardiu y refirmau ista iniciativa.

Gracias en especial a os nuestros y nuestras companyeras de Radio Topo
por o suyo refirme dende o prencipio. Asinas mesmo, queremos fer
alcordanza y fer plegar un saludo pleno de rasmia a un companyero que
por circumstancias especials no ha puesto estar con nusatros/as en
ista emisión.

Gracias a totz y todas por fer d’ista viella luenga una luenga cada
diya mas viva y mas fuerte.

L’aragonés ye bien vivo!

Audios

Ascuita as más de dotze horas de tot en aragonés que estió a emisión
d’estrela a estrela:

Sona o revel
http://www.archive.org/details/SonaORevel

Prou, prou luen
http://www.archive.org/details/ProuProuLuen-DestrelaAEstrela2011

La Enredadera
http://www.archive.org/details/LaEnredadera-DestrelaAEstrela2011

Nos veyemos en a Carrera Mayor
http://www.archive.org/details/NosVeyemosEnACarreraMayor-DestrelaAEstrela2011

Quan tenebanos cerras
http://www.archive.org/details/QuanTenebanosCerras-DestrelaAEstrela2011

A Lucana
http://www.archive.org/details/ALucana-DestrelaAEstrela2011

Fendo Orella
http://www.archive.org/details/FendoOrella-RadioTopo101.8Fm

A Clau Roya
http://www.archive.org/details/AClauRoya-DestrelaAEstrela2011